تحياتى الى وزير البترول والثروة المعدنية من دكتور عمل فى الثروة المعدنية وكان عضو مجلس إدارة لبعض الشركات وعضو فى المزايدات التى كانت تطرحها الهيئة لاختيار الشركات..
أؤكد لكم أن المهندس كريم بدوى وزير نشيط، ويتمنى ان تجنى مصر ثمرة تعب رجال صدقوا ما عاهدوا الله عليه منذ ما يقرب من 130 عام، وهذه شهادة منى بذلك ولكن أنصحه بالأتى:- أنا أرى يوجد شو إعلامى حولك وأرى بأنك بتهرول نحو جذب استثمارات فى مجال التعدين وهذا شىء جميل ولكن التؤدة وعدم التسرع والدراسة المتأنية مطلوبة مش ترمى أوراقك كله فهذا من حق الاجيال الموجودة والقادمة.
انا لفيت فى الصحارى المصرية واعرف كل صغيرة وكبيرة انا مش عاوز تيجى الشركات وتمشى لان زمان ناس عملوا دراسة جدوى مضروبة وفى ناس تانية عملوا دراسة جدوى على تشوينات؛ وناس بالغت فى تواجد معدن معين ولما تكلمت كان الرد بذىء..
فى احدى المزايدات كنت بدى درجة لكل شركة فجانى رئيس مجلس الادارة وقالى يا دكتور مش تدى درجة اكتب الشركة دى مقبولة رديت؛ طيب ازاى هتفرق بينهم لما ال 10 شركات واخدة مقبول؛ يا دكتور فى حاجات تانية هتفرق بينهم . خلاص انت حر .. جانى تانى يوم وقالى انت عندك حق …فى مرة تانية اصريت يحضر فرد من مجلس الدولة لشىء معين فى احدى الشركات كانت النتيجة رفع اسمى من مجلس الادارة فشكرت ربنا وحاليا سمعت ان هذه الشركة انتهت وذهبت ادراج الريح.
بعد اكثر من 20 عام والنتيحة للاسف .. انا اتمنى كل شركات التعدين تأتى للاستثمار فى مصر ولكن ادرس كويس ومن يتابع يكون ذو خبرة وامين؛ اضرب مثال فى شركات كتير بعد ثورة 2011 بنت عدد كبير من المساكن وحاليا الاعلانات شغالة لعرض هذه الشقق للبيع ولا يوجد اقبال؛ ليه؟ فى حاجة اسمها دراسة عرض وطلب فلو سمحت اعرض اللى عندك بس مش تسمع كلام حد واعمل حساب الاجيال القادمة. معلش اتحمل كلامى لان انا مش ليا مصلحة وطالما هتتكلم فى التعدين اجعل حولك بطانة ممن لهم خبرة فى التعدين صحيح الشركات هتيجى تعمل بحث ودراسة وتقييم الخام بس يتابعهم ناس ذو خبرة ويخافوا الله.. زمان كتبت من خلال الفيس رسالة للوزير اعزمه على فنجان قهوة فى مكتبى لاخبره بالسلبيات؛ اتقلبت الدنيا ومجاش فالحاجات دى متعود عليها ..المهم تقبلوا ماذكرته ومش هطول برغم فى جعبتى الكثير ولكن يجوز يكون للحديث بقية .. طابت اوقات من يعمل او عمل فى هيئة الثروةالمعدنية..
