للأسف، أكتر حاجة بتضيع مننا حاجات حلوة كتير هي الخوف.
الخوف من المواجهة عشان مش ضامن رد فعل اللي قدامي.
الخوف من التعبير عن المشاعر الحقيقية لحسن أخسر اللي قدامي.
الخوف من الكلام لحسن أغلط وأعك.
الخوف من إني أكون على طبيعتي وأتكلم بتلقائية لحسن أتفهم غلط.
الخوف من إن الناس تاخد عني انطباع غلط.
الخوف من بكرة، يا ترى هيحصل فيه إيه.
عايزة أقولك حاجة من واقع تجارب شخصية: طبيعي إنك تخاف عشان إنت بني آدم، بس الخوف ليه نسبة، والمفروض تكون بسيطة. ميكونش الخوف هو محور حياتك.
على الأقل لما بتحرر نفسك من الخوف، بيكون عندك فرص كتير للمحاولة.
لكن الخوف الزايد عن اللزوم، هيحول حياتك لجحيم حرفيًا.
يكفيك شرف المحاولة وإنك تكون حقيقي.
خليك على طبيعتك، العمر بنعيشه مرة واحدة. فوض أمرك كله لله. فمن سلّم أمره لله، أغناه..