بقالي كتير مكتبتش علي ال Facebook بسبب الظروف الصعبة اللي مريت بيها الفترة اللي فاتت
لسة حد بيسألني هل تجربتي في ال coaching بتساعد في تخطي الحزن
الحقيقة الحزن هو الحزن وبيمر بمراحل لازم نعدي بيها كنت اتكلمت عنها في كتابي ” رحلة البحث عن الطبطبة” عن مراحل الحزن الخمسة 5 stages of grief سواء انكار، مساومة حتي مرحلة التقبل . هو جايز اللي بيفرق هو ادراك ال Coach انه بيمر بمراحل حزن ويتقبل ان كل مرحلة هتاخد وقتها وان ترتيب مراحل الحزن ممكن يختلف من شخص للتاني
هو الحقيقة اللي فرق معايا كمان هو استيعابي لشوية رسايل من ربنا ، حاجات قبل كدة كانت ممكن تعدي علي
دلوقتي الواحد بيقف عندها. ممكن رسايل تيجي من ربنا تطبطب عليك وتدرك اني دي رسالة ممكن قبل كدة مكنش الواحد يبقي عنده الوعي الكافي ان دي رسالة
اي موقف صعب أنا بمر بيه بركز قوي قوي قوي مين فعلا كان سند وظهر وحضن وطبطبة،
مين اللي بيسال باهتمام ومين نقول هو او هي عملوا الواجب بس
بركز بأحساسي اللي دايما بيطلع صح، بركز في نبرة صوت اللي قدامي وهو بيسأل، بركز في طريقة السلام، بركز في نظرة العين وبحس بالحضن.
ودايما إحساسي بمشاعر الأشخاص بيطلع صح
سبحان الله ناس كانت بعيدة الموقف الصعب رجعهم يقربوا تاني
ناس مشوفتهاش من سنين جاتلي بحب واهتمام
ناس متوقعتش يساندوا ، ساندوا جدا بحب
وناس ممكن انت كنت سند نفسي وداعم ليهم وكان سوالهم للواجب
بس الحلو هو الموقف والشدة اللي اكدت جدعنة ناس بامتياز مع مرتبة الشرف. ناس مش مجرد تسال كل كام يوم تقولك محتاج حاجة، هما بيبقوا حواليك ومش مستنين حد يقولهم اية اللي يتعمل، مش مستنينك تطلب ، هما بيعملوا كل حاجة من قلبهم من غير ما انت تطلب.
كنت لسة بقول ان اللي يعرفني كويس
يعرف اني الحمد لله بحس بتعب اللي قدامي وبعرف يعني اية اني اكون سند لاي حد قريب تعبان او مريض او بيمر بتجربة فقد حد عزيز فعلشان كدة بعرف احس جدا بالطبطبة الحقيقة والاهتمام اللي من القلب
وسبحان الله فعلا في كورسات ال coaching كان من ضمن القيم الاساسية بتاعتي هو التعاطف مع الناس Being Compassionate
الحمد لله علي الحب والطبطبة اللي الواحد قدمهم في يوم من الايام وبترجع للواحد طبطبة وحب في الوقت اللي انت محتاجه.
بحس ان الحنية ومواقف الشهامة اللي اللي الوحد بيقدمها للناس كانّها استثمار، وربنا عارف هيرجعلك الاستثمار بتاعك دةً ازاي وفين وامتي .
ممكن تكون ساعدت حد وساندته ومردش ليك مواقف الشهامة بس يبقي انت بردة استفدت انك قدمت خير
فعلا خير تعمل ، سند تلقي.
هتقدم حب واهتمام هتلاقي طبطبة ودعم