بمناسبة هجوم «حزب الله» اللبناني على القاعدة الإسرائيلية.. تعال نتكلم شوية عن قدرات منظومات الدفاع الجوي في إسرائيل.. وأقولك إزاي «حزب الله» بيخترقها رغم تطورها..
1- منظومة آرو (السهم)
جيش الاحتلال الإسرائيلي صمم منظومة الصواريخ «آرو 2» و«آرو 3» بهدف اعتراض الصواريخ بعيدة المدى والصواريخ الباليستية.. كمان الصواريخ دي بتقدر تعترض الصاروخ خارج الغلاف الجوي عن طريق «رأس حربي» بيصطدم بالهدف أو الصاروخ أو الطائرة المسيرة اللي بيتم إطلاقها.
المنظومة دي صناعة إسرائيلية، وألمانيا اشترت منها «آرو 3» بقيمة 4.2 مليار دولار.
2- مقلاع داود (العصا السحرية)
منظومة دفاع جوي مُخصصة للتهديدات متوسطة المدى، زي الصواريخ الباليستية اللي بيتم إطلاقها من مسافات متوسطة، زي 100 أو 150، وحتى 200 كيلومتر، وهي من صناعة مشتركة بين إسرائيل وأمريكا، وبتقدر تعترض الطائرات المسيرة وصواريخ كروز وغيرها من التهديدات متوسطة المدى.
3 – كيبات برزيل (القبة الحديدية)
علشان تحقق إسرائيل التكامل في نظامها الدفاعي كان لازم يكون في منظومة دفاع قصيرة المدى، وده علشان المخاطر القريبة مثل صواريخ حماس والمقاومة الفلسطينية من قطاع غزة، أو الصواريخ المضادة للدبابات اللي بتضرب من جنوب لبنان.
المنظومة طورتها شركة «رافائيل» العسكرية الإسرائيلية بدعم أمريكي، ودخلت الخدمة عام 2011 بسبب الحروب اللي كانت إسرائيل بتشنها على غزة، كمان طورت منها نسخة بحرية لحماية السفن وحقول الغاز.
دي أبرز المنظومات الدفاعية في إسرائيل.. وواضح جداً إنها بتحاول تعمل حالة من التكامل علشان تغلق مجالها الجوي أمام أي تهديدات مُحتملة، سواء من بعيد «إيران – الحوثيين»، أو من قريب «غزة – جنوب لبنان – سوريا»..
إزاي بقى «حزب الله» رغم كل القدرات دي بيقدر يخترق المجال الجوي الإسرائيلي؟!
– حزب الله معروف إن عنده ترسانة أسلحة كبيرة جداً تصل لـ150 ألف صاروخ ما بين متوسط وعال وقصير المدى، بالإضافة إنه يُعتبر أكبر الجماعات التي تمتلك طائرات مسيرة متطورة..
– أولاً، حزب الله خلال الفترة الأخيرة حدد أهداف كتيرة في العمق الإسرائيلي وفي المنطقة الشمالية، ومعظمها أهداف حيوية وعسكرية، وعنده خريطة كاملة عن المناطق دي من خلال المسيرات اللي دخلت صورت وبعتت الصور أو رجعت تاني لبنان.. وده حصل في شهر يونيو اللي فات لما نشر حزب الله فيديو لخليج حيفا من طائرة مسيرة مدته 9 دقائق، وصورت موانئ بحرية ومطارات على بعد 27 كيلومتر من حدود لبنان.
– ثانياً، حزب الله بيستخدم أعداد الصواريخ الكثيفة في مداهمة الدفاعات الجوية في إسرائيل عن طريق أسراب كثيفة من الصواريخ -قصيرة أو متوسطة أو بعيدة المدى، حسب الهدف- وده بيتسبب في تفريغ بطاريات الدفاع الجوي اللي بتحتاج تشحن من جديد، وده بياخد وقت، وكمان مش بتقدر تعترض كل اللي تم إطلاقه بسبب الكثافة.
– ثالثاً، حزب الله بيكون مجهز السلاح اللي هيتسهدف بيه المكان المُحدد، وبيكون في الأغلب طائرة مسيرة تطير على مستوى قريب من الأرض وتحمل متفجرات، ويمتلك حزب الله طائرات مسيرة انتحارية، وأخرى تستطيع إطلاق قذائف، وكلا النوعين من الطائرات يستطيع حمل وزن كبير من المتفجرات.
– رابعاً، حزب الله بيعرف يستخدم كويس تضاريس الجنوب اللبناني اللي بتساعد الطائرات المسيرة إنها توصل بسلام للحدود الإسرائيلية بدون رصدها خارج الحدود.
وغالباً ده السيناريو اللي حصل النهاردة بسبب العدد الكبير من الصواريخ اللي تم إطلاقها من الجنوب اللبناني على إسرائيل.