هبه سلامة تكتب: الضرب في «الأهلي» .. حراااام

طيب بما إني هديت شوية نتكلم ف ماتش الزفت اللي شفناه امبارح ده
بالنسبة لمعاناة الأهلي حاليًا واللي لا باين له منافسة محليا ولا خارجيا
مبدئيا كده انت للأسف لو الماتش كان امتد ساعتين تلاتة ما كناش هنقدر نسجل برضه
أصل معلش مين هيسجل ؟ فين المهاجم؟ ماعندكش مهاجم أه والله زمابقولك كده
انت بلا فخر استخسرت تكلف نفسك وتجيب مهاجم يوازي اسم وكيان الأهلي بإمكانات محترمة تعوضك وسام ابو علي اللي اتكل ع الله وسابك
ومشوا نفسكم يا جماعة ع كده وسيري يا نورماندي وهوب النورماندي بتغرق ف البحر من أول قلم
تاني حاجة الحمد لله إن المباراة خلصت تعادل الواحد طول الماتش قاعد إيده ع قلبه إن مُمكن الشناوي يستقبل جون من أي كورة معدية بره ف الشارع حتى
حراسة المرمى بقت مركز ضعفك مش قوتك زي قبل كده
أنا ما بقولش إن الشناوي وحش أعوذ بالله عشان ما حدش م اللي بيمجدوا ف الشنو يبرق لي بعينيه
لكن مستوى حراسة المرمى ف الفرق الكبيرة عموما لااااازم يكون فيه ثبات
مش يوم فوق ويوم تحت ويا سيدي التساهيل على الله
بالنسبة للسير محمد مجدي أفشة هو انت ماسك حاجة علينا يعني ممضي الأهلي شيكات على بياض انك تلعب
يا ناااااس أفشة خلص ولا ينفع يلعب أساسي في الأهلي، ولا حتى احتياطي خلاااااص
أحمد عبدالقادر ما بياخدش فرصة ليه ما تديله فرصة يا اسطا ولو ألشت هو أحسن من مكسحين كتير يعني فرقت إيه
البوب الكبير بقى كريزيديه
عاوز مننا ايه يا تريزيجيه لأ بجد.. طب انت نفسك عاوز ايه
يعني هل انت جاي تنظر ع الفرقة وتعمل مدير ولا جاي تحقق حاجة بجد؟
طب احنا لحد دلوقتي ما شوفناش منك حاجة غير انك بتلعب لنفسك وبستايل انت لوحدك اللي فاهمه
وبالنسبة لأسوأ ما في العوامل الخارجية ف المباراة كانت الحكم أمين عمر
أمين عمر أصلا طول حياته التحكيمية مستحيل يلعب ماتش من غير ما الكورة تخبط فيه ولأول مرة في التاريخ متحصلش الحكاية دي، هو حاول كتير، لكن ربنا موفقوش.. تحركاته مستفزة ف الملعب، وده مش صح بالنسبة لحكم قديم
المشكلة كمان إنه تقريبا كان مترجت عدد معين م الإنذارات للاعيبة الأهلي كان نازل يحققه، ونجح في ده مبروك عليك بونص يا أبو النزاهة
طول ما الناس بتخبي وشها وتدفن راسها ف الرمل مش هنوصل لحل
وعاوز حل يا ابو الكباتن هات مهاجم .. مشي المكسحين.. اظبط حراسة المرمى وساعتها هترجع تاني المرعب اللي بيتعملك مليوووون حساب..
وعجبي