سبحان الله… لو بصيت لعملية التنقيب والبحث عن الغاز والنفط، هتلاقي إننا في الحقيقة بنبحث عن “مخلوق” ربنا أوجده واستودعه بين الصخور في بطن الأرض. مخلوق عنده من القوة والطاقة الجبارة إنه يدمر كل حاجة تقف في طريقه لو خرج عن السيطرة.
وعشان كده، أول ما بنبدأ عمليات الحفر، بنكون كلنا على أعصابنا ومركزين أوي إن المخلوق ده يفضل تحت سيطرتنا التامة طول الوقت. مع كل قدم بنحفره في الأرض، بنحاول نعوض مكان الصخر اللي كسرناه بـ “سائل حفر” (الطفلة) يكون ليه وزن وكثافة كافية تسيطر على ضغط المخلوق ده.
وهنا بيتجلى قدامنا عظمة الخالق في فكرة “الميزان” و”التقدير”.. ربنا سبحانه وتعالى بيقول: (وَخَلَقَ كُلَّ شَيْءٍ فَقَدَّرَهُ تَقْدِيرًا).
عملية التحكم في الآبار (Well Control) كلها قايمة حرفياً على الآية دي! ميزان دقيق وحساس جداً بين ضغط الطبقات (Formation Pressure) اللي محبوس جواه المخلوق الثائر ده، وبين ضغط سائل الحفر (Hydrostatic Pressure) اللي بنحاول نروضه بيه. لو وزن السائل قل، المخلوق ده هيهيج ويفور في وشنا (Kick)، ولو زاد عن حده، هنكسر الصخر الجميل اللي ربنا خلقه ونفقد السائل بتاعنا (Lost Circulation).
بس أنا عايز آخدك لنقطة تانية أبعد من كده شوية…
أنت عارف إن التكوين الصخري ده ربنا خلقه واقع تحت تأثير مجموعة من الضغوط، والضغوط دي هي السبب في سكونه واستقراره. ولما بنيجي نحفر، إحنا فعلياً بنُخل بالمنظومة الهندسية المتزنة دي. وعشان نرجع التوازن ده تاني، بنبدأ نبطن جدار البئر بمواسير صلب (Casing) ونصب وراها أسمنت.
ربنا سبحانه وتعالى بيقول: (وَالْجِبَالَ أَوْتَادًا)، الجبال بتحفظ توازن وثبات القشرة الأرضية، وإحنا وإحنا بننزل مواسير التبطين كأننا بنعمل “أوتاد صناعية” تسند جدار البئر وتعوض الصخر اللي شلناه، عشان نحفظ التوازن ده من الانهيار ونمنع الطبقات إنها ترد فينا.
ولو بصيت لأجهزة منع الانفجار (BOP) العملاقة اللي بنركبها على فوهة البئر كخط دفاع أخير، هتلاقيها التطبيق العملي لمبدأ “اعقلها وتوكل”. إحنا بناخد بكل أسباب العلم والهندسة عشان نحبس القوة دي، لأننا عارفين إن ربنا سخرلنا الأرض وما فيها: (وَسَخَّرَ لَكُم مَّا فِي السَّمَاوَاتِ وَمَا فِي الْأَرْضِ جَمِيعًا مِّنْهُ ۚ إِنَّ فِي ذَٰلِكَ لَآيَاتٍ لِّقَوْمٍ يَتَفَكَّرُونَ). والتسخير ده عمره ما كان معناه العبث؛ ده بيفرض علينا نفهم القوانين والسنن الكونية في الضغط والحرارة وخواص الموائع، ونتعامل معاها بمنتهى الاحترام.
في النهاية، وقفة مهندس الحفر أو خبير التحكم في الآبار على البريمة وهو بيراقب الشاشات والعدادات، هي في الحقيقة حالة من “التدبر” في خلق الله. كل برميل طفلة بينزل، وكل ضغط بيتقري على الـ Choke Manifold، هو شهادة حية على عظمة الخالق اللي أودع الطاقة دي في أضيق مسام الصخور، وإدانا العقل اللي نروض بيه المخلوق ده عشان نطلعه للنور وينفع البشرية.
ده مش مجرد شغل هندسي أو حفر بير… ده مشهد بيلخص حرفياً معنى “الخلافة في الأرض” وإعمارها، وقصة ميزان ربنا اللي بنتعلمه كل يوم في شغلنا.
كاتب المقال : المهندس هاني متولي Well Control Specialist – PhD Researcher in Petroleum Engineering